رہا میں جو آج تک یہ دِل ِ ناتواں سنبھالے

غزل

راشؔد ذوالفقار

رہا  میں   جو   آج   تک  یہ دِل ِ ناتواں سنبھالے

نئی   بے رُخی   یہ  تیری    مجھے  مار ہی  نہ   ڈالے

میں   صعوبتوں  کا شائق مجھے کیا غرض خوشی سے

میری   آرزو   کا   حاصل ہیں ، سفر تھکن یہ چھالے

تیرے   روپ   ہی   نے   بخشی   یہ    نزاکتِ تخّیل

تیری زُلف کے اندھیرے ، مری راہ کے اُجالے

یہ   ادائے    شاطرانہ    تجھے   ہمنشین      مبارک

مرا   مسلکِ   محبت ،  تیرے  عیب  تک  چھپالے

ہے بڑھی ہوئی انا پھر ، کہیں  بات  بڑھ  نہ  جائے 

یہی وقت کی ندا ہے ، اُسے   بڑھ  کہ خُود  منالے

وہ  سرور  دے  گئی  ہے ، تیری  چار دن  کی قُربت

نہ   ہوا  نشہ   پھر   ایسا ، کئی   جام   بھی   اُچھالے

چلی طرز ِنو  کچھ  ایسی  یہاں  ،  چاہتوں  کی  راشؔد

ہوئے  سب حسین جذبے کسی مصلحت کے  پالے