دی نہ ہو ہم نے تمہیں کوئی دُعا ایسی نہ تھی

غزل

راشؔد ذوالفقار

دی  نہ ہو  ہم  نے  تمہیں  کوئی دُعا  ایسی نہ تھی

تم   خفا  جیسے  ہوئے  میری خطا ایسی   نہ تھی

جو   ذرا   سی   گرمئی   حالات  سے  معدوم ہو

تیری سانسوں میں تو خوشبوئے وفا ایسی نہ تھی

تم تو واقف تھے ہمارے سب مزاجوں سے مگر

ہم  پلٹ  آتے  تمہاری   ہی  نِدا  ایسی   نہ تھی

گونج  ہے تَرکِ  تعلق  کی  ہمارے ، شہر میں

جب  کہ  نیّت  تو  ہماری با خدا  ! ایسی   نہ تھی

آنسوؤں  میں  ڈوبنے  کو  ہے  تمنّائے  حزیں

نخلِ  خواہش  ہو   ہرا  آب و ہوا  ایسی   نہ تھی

گُم  ہے بیٹھا خُود  میں وہ   بیزار محفِل  سے   لگے

پیشتر  اِس عشق  کے  حالت سُنا  ایسی    نہ تھی

دِل کی راشؔد خشک سالی کے ہرے ہیں گھاؤ سب

مُندَمِل   ہو  تے    کہاں   کوئی  گھٹا  ایسی   نہ تھی